Pendent era comission informativa deth Conselh Generau d’Aran,  s’a presentat er informe jurídic encargat pera institucion tà tractar eth contengut deth dret a decidir dera Val d’Aran reconeishut ena naua Lei d’Aran aprovada en 2015 en Parlament de Catalonha. Es juristes Alfredo Galán e Eduard Roig an amiat a tèrme era presentacion ena institucion, a on an destacat qu’ei eth prumèr viatge qu’un tèxt normatiu reconeish especificamens aguest dret a decidir d’un territòri.

D’aue biais, eth síndic d’Aran, Carlos Barrera, a mantengut dubèrta era pòrta a qu’era figura deth Conselh Generau d’Aran pogue obtier un reconeishement institucionau desparièr laguens dera Constitucion Espanhòla, en cas que se daurisque un periòde de reforma.

Per tant, juridicaments, eth dret a decidir dera Val d’Aran se manten vigent laguens deth marc jurídic actuau en Catalonha. En cas d’ua ipotetica independéncia de Catalonha, era Val d’Aran aurie de començar un procès nau tà manifestar quin tipe de relacion politica e jurídica volerie mantier laguens d’un nau Estat catalan.