Era Val d’Aran se premanís entà víuer ua des nets mès importantes der an, sustot entara mainadèra. Aguesta pròplèu maitiada deth 6 de gèr, es Reis d’Orient visitaràn es cases dera gent, entà liurar un pialèr de regaus coma ja ei abituau. Abantes, pendent era tarde d’aguest 5 de gèr, tota era familia poderà gaudir damb era preséncia de ses majestats damb es diuèrses cavaucades que s’an premanit, en tot èster acompanhadi des sòns patges reiaus.

Aguestes cavaucades s’amiaràn per lèu toti es pòbles deth país a compdar des 6 dera tarde, a on es mès petits, de Vaquèira enquia Les, poderàn veir d’apròp as Reis d’Orient, entà dempús poder-les demanar es regaus entad aguest pròplèu sèr. Ei ua des jornades magiques e damb mès illusion qu’an lòc ath long der an, e que de ben segur deisharà a mès d’un damb nervis en tot demorar saber qu’ei çò que ses majestats lis an amiat d’Orient. Joguets entà qui s’a portat ben e carbon entà qui a estat mès dolent. Un dobte que sonque se poderà saber ath maitin, en tot descorbir era màgia qu’amie era jornada de Reis.