Ath torn des 9 e mieja deth maitin s’a produsit en Les er incendi d’un camion cisterna cargat de gas. Segontes hònts oficiaus, eth camion se trapaue estacionat des d’ager en parcatge plaçat ath costat dera rotonda d’entrada de Les e er incendi s’a iniciat a causa d’ua pèrta de gas ena cisterna.

Eth veïcul auie previst descargar eth gas naturau en depòsit dera piscifactoria de Les.

Proteccion Civiu a activat eth Plan Transcat, s’a accionat era sirena d’avís ara poblacion e er Ajuntament de Les a demanat as vesins eth sòn confinament per risc quimic enquiath torn des 11, quan era situacion s’a començat a regularizar.

Aguest accident afècte encara ath trànsit entre Bossòst e Les, qu’a estat talhat per seguretat en ambdús sentits e es Mòssos an previst que contunhe atau pendent ues quantes ores.

Eth huec a començat enes valvules deth camion e a afectat ara part exteriora de dejós dera cabina e ara meitat dera cisterna. Entà liberar era sobrepression que patie era cisterna, es Pompièrs an agut de liberar gas a trauès d’ua valvula de seguretat.

En escandilhament deth huec an trebalhat diuèrses dotacions de Pompièrs d’Aran des parcs de Les, Bossòst e Vielha, amassa damb es servicis d’emergéncies e es Mòssos d’Esquadra. Tot e qu’eth huec a estat extinguit, mentre contunhe era pression ena cisterna e era pèrta de gas, contunharà activat eth Plan Transcat.

FÒTOS CEDIDES PETH CONSELH GENERAU D'ARAN