Er empresonament politic d’Oriol Junqueras e sèt conselhèrs dera Generalitat eth dia 2 de noveme per supausat delicte de rebellion, sedicion e mauversacion d’hons publics, provoquèc era reaccion de mès d’un centenat d’aranesi que se concentrèren aquera madeisha tarde deuant dera Plaça deth Conselh.

Pendent aguesta concentracion, es assistents demanèren era libertat d’aguesti representants politics e ath crit de “non ètz soleti”, les voleren hèr arribar era sua solidaritat deuant un acte que considèren antidemocratic.

Aguesti empresonaments, se pense, afectaràn as eleccions deth pròplèu 21 de deseme.

Mès era concentracion deuant deth Conselh non a estat era unica mòstra de protèsta deuant aguesta decision dera jutge Lamela, e ei que a prumèra ora deth maitin següent ar empresonament, es aranesi an talhat era circulacion dera N-230 en ambdús sentits en diuèrsi punts.

E, tàs 10 deth maitin, es manifestants an començat a produsir retengudes quilometriques de trafic en sentit de pujada, provocant talhs e coes de coches e camions, que s’an anat escampilhant dues ores dempús, mès qu’encara contunhauen, en menor mesura, en cap-lòc aranés damb direccion Naut Aran.