Eth sindic d’Aran, Carlos Barrera, a confirmat aguest meddia qu’eth Conselh Generau d’Aran a rebut es requeriments judiciaus entà qu’es locaus previsti entath referendum der 1 d’octobre, siguen precintats e, per tant, que non se permete votar. Es 3 locaus de titolaritat dera institucion son era Casa Forestau de Bossòst, era glèisa Sant Joan d’Arties, convertida en sala d’exposicions, e era aubèrja Era Garona de Salardú.

D’aute biais, Barrera, a volut manifestar eth sòn supòrt ara libertat d’expression des ciutadans aranesi, en tot deféner a qui volgue votar coma a qui non volguen exercir aguest dret. Era normalitat aurie de mantier-se en aguesta jornada. Tanben a lamentat era imatge qu’a gessut en diuèrsi mieis de comunicacion estataus sus er espanholisme d’Aran, que Barrera, a refusat.

Fin finau, a rebrembat qu’era voluntat des aranesi ei era de demorar ath cant de Catalonha coma s’a mantengut ath long des sègles, e qu’era solvabilitat economica deth Conselh Generau d’Aran s’assegure gràcies a contunhar laguens de Catalonha.