Damb era celebracion dera jornada de Santa Creu, an finalizat es hèstes majors de Salardú, qu’un an mès mèrquen eth punt de gessuda des hèstes dera Val d’Aran. Enguan, deth 28 d’abriu ath 3 de mai, s’an podut celebrar un pialèr d’actiuetats entà tot tipe de publics. 6 dies damb, sustot fòrça diversion, e qu’a acabat damb era tradicionau amassada de creus, en tot junhér-se es desparières creus que formen part deth municipi de Naut Aran. Un cortègi que s’a iniciat damb aguesta amassada, e qu’a portat enquiara glèisa de Sant Andreu, a on a agut lòc era ofici religiós. Aguesta missa a supausat er acte previ ara concentracion ena Plaça dera pica, a on es capelhans an procedit a beneïr es tèrmes.