Er espòrt femenin crèish ena Val d’Aran. Dempús dera excellenta acuelhuda qu’auec era 12aua edicion deth torneig de fotbòl Sala de Vielha femenin, s’a prepausat en territòri er hèt qu’es hemnes e joenes poguen practicar espòrt exclusivament entre eres en ua jornada ath long deth mes de mai.

Anterioraments, se jogaue a fotbòl masculin es dimars e es dijaus e, pendent aguest mai, jogaràn es dijaus es hemnes. Aguesta iniciativa pilòt a auut ua plan bona acuelhuda enes prumères setmanes e era idèa ei era de impulsar aguest plantejament de cara ara següenta edicion der Espòrt Popular de Vielha.

En Palai d’Espòrts de Vielha, ath torn d’un dotzeat de hemnes pogueren gaudir dera practica de fotbòl en tot estrear aguest nau format.

Er espòrt popular ei ua accion gratuïta impulsada per Ajuntament de Vielha e Mijaran en collaboracion damb eth Conselh Esportiu dera Val d’Aran entà que persones de totes es edats poguen practicar espòrt e auer abituds saludables.