Un Estudi de Foment contemple invertir 295 milions ena milhora dera N-230

16/01/2018

Eth Ministèri de Foment exposèc a Informacion Publica ager, 15 de gèr, er Estudi Informatiu "Acondicionament dera carretèra N-230. Tram: Sopeira-Boca Sud deth nau Tunèl de Vielha"

En aguest estudi, que siguec aprovat provisionaument eth 20 de deseme de 2017, se contemplauen dues alternatiues entà acondicionar aguest tram de carretèra: era prumèra includie era milhora de 39 km, des quaus eth 20% transcorrerien en tunèl e eth 9%en viaducte; e era dusau, de 40 km de longitud, des quaus eth 14% transcorren en tunèl e un 7% en viaducte e qu'a estat, finauments, era preseleccionada. 

Eth pressupòst estimat de licitacion des òbres entad aguesta alternatiua ei de mès de 295 milions d'euròs

Era milhora d'aguest tram de carretèra ei un des reclams mès urgents entara Val d'Aran pera grana concentracion d'accidents que s'i produsissen a causa non sonque dera nauta afluéncia de coches, senon tanben de camions.

IMATGE: CONSELH GENERAU D'ARAN
Clara Villar