Es Hèstes de Vielha 2017 dejà s’an dat per finalizades. Des de dijaus dia 7 enquia deluns 11 de seteme, cinc intensi dies d’hèsta plens d’activitats de tot tipe entà toti es publics.

Era net de penhes, eth dia en aunor ara mair de Diu de Mijaran, era net tematica qu’enguan auie coma tema principau era musica e era baishada deth cap dera vila son tostemp es moments mès demoradi pes centenats de persones qu’acodissen ad aguestes hèstes e an estat, coma tostemp, tot un èxit.

Pendent aguest darrèr dia, eth cap-lòc aranés a estat escenari de diuèrsi eveniments qu’an compdat damb fòrça participacion per part des vesins e vesies deth municipi. Entre d’autes activitats i auie era barada de sardanes, eth concors de botifarra, eth parc infantil o eth Gran Prix.

Ua des activitats que se repetie ena programacion des darrèri ans a estat era naua edicion deth Castèth de Caishes, a on es mès valents s’an atrevit a pujar enquia casi ua trentia de caishes mentre eth public les aplaudie.

Coma dejà ei tradicionau, es huecs artificiaus e eth bingo an estat es activitats qu’an barrat aguestes darrères hèstes der ostiu, abantes de començar, un còp mès, damb era rotina e que dèishen a mès d’un damb ganes des der an que ven.