UA lamente era nulla implicacion dera Generalitat ena creacion dera residéncia de Les

09/11/2017

Unitat d'Aran a lamentat publicaments, mejançant un comunicat oficiau, era "nulla implicacion" dera Generalitat de Catalonha en bastiment dera residéncia geriatrica de Les.

Rebrembam qu'en darrèr plen deth Conselh, s'aprovèc ua modificacion de crèdit de 3'6 milions d'euròs, 2 des quaus s'invertiràn en aguest nau bastiment, ei a díder, qu'aguesta residéncia entara gent grana en Baish Aran se crearà damb hons pròpis deth govèrn aranés

Aguesta modificacion, informe eth document publicat, provòque qu'er hons de romanent de tresoreria deth Conselh (er hons deth que dispause eth Conselh entà afrontar possibles dificultats economiques) se veigue redusit de ath torn de cinc milions d'euròs a, apuprètz, un milion.

Eth portavotz d’UA en Conselh, Francés Boya, dejà senhalèc que “damb ues infrastructures geriatriques que se ven superades pera demanda, èm conscients de qu’Aran a de besonh un equipament coma aguest de manèra urgenta”.

Per aquerò, des deth partit an lamentat qu’era Generalitat non assumisque cap còst en bastiment d’aguest bastiment, en tot hèr qu’era maxima institucion aranesa afronte integralaments era inversion.

En aguest sens, eth comunicat d'UA, destaque que: "dempús de mès d’un an damb negociacions entre eth Conselh e era Generalitat, a dia d’aué non existís cap acòrd entà fixar eth numerò de places concertades qu’aurà era naua residéncia, causa qu’ei imprescindibla entara viabilitat economica der equipament".

Aguesta situacion, remèrquen, "contraste damb çò que passèc pendent eth govèrn d’UA en 2010, quan s'inaugurèc era residéncia Sant Antòni de Vielha. Eth còst des òbres d’aguest espaci, qu’artenhec es 2,5 milions d’euros, siguec integralaments assumit pera Generalitatde Catalonha, en tot crear-se tanben es places sociosanitàries".

Entà Unitat d’Aran, "eth Conselh Generau cor un gran risc en tot redusir tant eth romanent de tresoreria, per aguest motiu, considère qu’era rèsta d’accions que s’an includit en aguesta modificacion poirien demorar ath pressupòst de 2018 evitant atau ua reduccion tant drastica d'aguest hons".
Clara Villar