Era sedença deth Conselh Generau d’Aran a acuelhut era amassada de presentacion deth projècte que cerque augmentar era seguretat vial dera carretèra N-230.

Eth govèrn aranés encarguèc un estudi qu’a analizat eth tram de carretèra que va des de Pas d’Aran enquia Vielha, un totau de 64 quilomètres. Segontes donades oficiaus deth Ministèri de Foment, en 31 d’aguesti 64 quilomètres, ei a díder, en un 48% d’aguest tram i a agut un o mès accidents de trafic entre es ans 2006 e 2015.

Eth document elaborat pes tecnics contemple era creacion d’un totau de 13 quilomètres de tresau carril, 10 en direccion Vielha e 3 direccion Lhèida, que poderien èster reversibles.

Se bastirien tres viaductes (un totau de 4km) en aguest tram que va de Pas d’Aran enquia Vielha, dus d’eri ena zòna d’Escales, entà aumentar eth radi de corvatura.

Ei eth Ministèri de Foment espanhòu qui a d’aprovar aguest projècte, qu’aurie un còst totau de 90 milions d’euròs, e milhorarie fòrça era seguretat des conductors.

Ena amassada de presentacion i sigueren presents, entre d’auti, eth Sindic d’Aran eth President deth Conselh Comarcau dera Nauta Ribagòrça e es bailes o representants des ajuntaments de Pònt de Suert, Vilaller, Vielha, Bossòst e Les que se mostrèren fòrça satisfèts damb er estudi.

Peth moment, manque demorar era aprobacion a un projècte fòrça necessari entà poder aufrir ua major seguretat as conductors que recorren ua N-230 ena que dejà i a agut massa accidents.