S’a presentat des deth Conselh Generau er hestau culturau, “Terson. Eth son dera tèrra”, dedicat ath patrimòni, lengua e musica en Aran, autant en aranés coma en d’autes varietats der occitan e damb tematica restacada ath Pirenèu. 

Tad aguesta prumèra edicion s’an programat activitats totes eres restacades damb era lengua e era tèrra, exposicions, presentacions de libres , activitats entàs familhes e tanben se poiràn veir pèces de teatre e teatre musicau damb entitats que son assolidades en territòri, concèrts en aranés e occitan damb grops coma Sarabat, Rambalh o Parpalhon. Atau madeish, eth grop “La Ronda de Boltaña” qu’arribe deth Pirenèu aragonés, participarà tanben d’aguest hestau.

Des deth govèrn d’Aran s’a afirmat que aguesta a d’èster era prumèra pèira entà impulsar era creacion culturau deth país, en aranés, en occitan, e dehòra ath long des Pirenèus, ath delà d’assolidar es actes mès hestius dera Hèsta d’Aran, qu’amasse tant es parts mès institucionaus damb es mès populares.