Era Taula per la Democràcia, integrada pes sindicats, es entitats sobiranistes e d'autes, a convocat entad aguest dimars dia 3 d'octobre ua arturada generau. Ena Val d'Aran, dejà i a entitats que s'an prononciat en favor d'aguesta arturada coma ei eth Sindicat d'Estudiants. Es alumnes der Institut d'Aran participaràn en ua manifestacion a compdar des 11:00 damb coquèles entà hèr fòrça tapatge. Començaràn en Institut e finalizarà deuant der ajuntament de Vielha e Mijaran. Aguest acte vò protestar contra era brutau repression policiau en Catalonha per part des fòrces de seguretat der Estat Espanhòu. Ath delà, tanben demorarà barrat eth Centre de Formacion d'Adults dera Val d'Aran. 

En çò que tanh, as ajuntaments deth país, en Les dejà s'an somat ad aguesta iniciatiua, e demorarà barrat pendent tota era jornada. D'auti ajuntaments, coma eth de Vielha e Mijaran, mantierà eth sòn orari abituau. Tanben seràn barradi d'auti emplaçaments publics, coma er Archiu Generau d'Aran plaçat en Arròs. 

Ath long deth dia, contunharam en tot informar sus era evolucion dera grèva generau en país.


IMATGE: Membres fondacionaus de Taula per la Democràcia (eldiario.es)