ACTUALITAT
Eth govèrn d’Aran impulse eth programa “Ligams” entà afrontar era solitud non desirada enes persones granes
22/03/2024
Aguest projècte, impulsat peth Conselh Generau d’Aran a trauès des Servicis Assistenciaus Integrats e damb era collaboracion dera entitat ISOCIAL, nèish coma responsa ara solitud non desirada en Aran, sustot en persones granes, e damb era volontat de dar forma a ua comunautat mès integradora e que fomente eth suenh mutuau
Eth govèrn deth Conselh Generau d’Aran a trauès des Servicis Assistenciaus Integrats, e en collaboracion damb era entitat ISOCIAL, a iniciat un projècte entà intervier e sensibilizar sus eth fenomèn creishent dera solitud non desirada enes persones granes e trapar estrategies entà abordar aguesta problematica en nòste territòri, compdant damb era comunautat e er hilat vesiau.
“Era solitud non desirada a conseqüéncies ena salut fisica e emocionau des persones, e pòt provocar un aument des nivèus d’estrès, ansietat e depression entre d’auti efèctes” explicaue era sindica d’Aran, en tot híger que “eth projècte Ligams nèish coma responsa ad aguesta solitud, sustot en persones granes”.
Entà elaborar ua diagnòsi dera situacion en Aran s’a creat un questionari adreçat ara ciutadania en generau, as professionaus de diferents airaus, a entitats e establiments entà remassar era opinion e impressions sus aguesta problematica en nòste entorn, que se pòt respóner en aguest ligam: https://forms.gle/R2EJwZVQDWYgLsi56
“Entath govèrn d’Aran ei fonamentau méter as persones en centre des politiques e credem que damb aguest projècte podem arténher hèr front a ua problematica qu’afècte a un sector vulnerable dera nòsta societat, en tot dar forma a ua comunitat mès integradora e que fomente eth suenh mutuau” afirmaue era sindica d’Aran.
Les ei eth prumèr municipi a on se desvoloparà aguest programa, coma pròva pilòt, e dempús s’anarà hènt extensiu a tot eth territòri de forma progressiva.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga