ACTUALITAT
Eth Conselh Generau d’Aran e era Communauté de Communes Pyrénées Haut-Garonnaises commemòren eth Tractat istoric de Lies e patzeries
24/04/2024
Aguest maitin s’a celebrat er acte commemoratiu deth tractat de Lies e Patzeries, a on era sindica d’Aran e eth president dera Communauté de Communes Pyrenées Haut Garonnaises, acompanhadi de representants d’andús costats dera termièra, an tractat disparièrs ahèrs, com er agropament de salut transfronterèr tà mutualizar servicis, era memòria istorica “Camins dera Libertat”, en matèria educativa era formacion d’estudiants en centres des dus costats dera termièra e era creacion de GRT de Comenge e d’Aran
Aguest maitin a auut lòc er acte de commemoracion deth 510 e 511 ans deth Tractat de Lies e Patzeries en Hòs, un acte presidit pera sindica d’Aran, Maria Vergés, e eth president dera Communauté de Communes Pyrénées Haut-Garonnaises, Alain Puente, e qu’a compdat tanben damb era participacion dera conselhèra de Coneishement, Angelina Cases, eth vicesindic tresau, Javier Cavero, e eth d’Abitatge e Agenda Urbana e alcalde de Les, Andreu Cortés.
Der aute costat dera termièra, era exsenadora europèa, Josette Durrieu e era vicepresidenta de Cultura e Collaboracion Transfronterèra, Marie Claire Uchan, entre d’auti.
Pendent aguesta jornada s’a hèt un repàs des diuèrsi projèctes compartits entre eth Conselh Generau d’Aran e era Communauté de Communes Pyrénées Haut Garonnaises, coma ei eth cas der agropament transfronterèr tà mutualizar es servicis sanitaris. Ua memòria istorica que se’n brembe “des hujuts” entre frontères, e desvolopar projèctes transfronterèrs en matèria educativa era formacion d'estudiants en centres des dus costats dera termièra , tanben es camins GRT de Comenge enquia Aran,
Era sindica d’Aran, Maria Vergés a manifestat: “Era relacion istorica entre es dus costats dera termièra s’a mantengut tanben enes tempsi actuaus”. E a hijut: “Era volontat deth Govèrn d’Aran ei mantier aguesta relacion d’afrairament e collaboracion institucionau en tot trabalhar amassa en matèries coma era sanitat o era educacion, entre d’autes.
Un acte commemoratiu dedicat ara cooperacion transtermierèra, entre eth govèrn aranés e es representants dera Communauté de Communes Pyrénées Haut-Garonnaises.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga