Es Hèstes de Vielha comencen damb fòrça!

08/09/2017

Un an mès, dejà a començat era Hèsta Major de Vielha. Un eveniment que, coma tostemp, aurà lòc pendent es dies 7 e 11 de seteme entà acabar dera milhor manèra er ostiu.

Aguesti son cinc dies plens d’activitats pensades entà tot eth mon, grani e petits,e que se realizen pendent tot eth dia, mès era Comission d’Hèstes dejà portaue cauhant motors des de deluns, dia 4 de seteme, damb diuèrsi eveniments fòrça variats coma eth campionat de frontón, eth concors de coctèls, diuèrsi jòcs infantils o un recitau de musica barròca, entre molti auti.

Coma tostemp, era hèsta deth cap-lòc aranés dèc començament damb eth tradicionau dia de penhes, a on centenats de persones, sustot joeni, gesseren en carrèr damb eth sòn grop d’amics entà gaudir deth gran passavila qu’acabèc en Ajuntament de Vielha e Mijaran a on, reines e dames d’aunor des hèstes sigueren coronades.

Dempús deth Passavila, es participants poderen gaudir deth sopar de penhes, organizat enguan pera penha “20 de copas”, e ara seguida d’ua net de balh damb orquèstra e DJ.

Eth prumèr d’aguesti dies d’hèsta estèc tot un èxit d’assisténcia, e ei qu’era darrèra hèsta der ostiu tostemp arribe damb ganes.

Clara Villar