Eth pròplèu 1 d'octobre, dia deth referendum d'autodeterminacion qu'amie a tèrme era Generalitat de Catalonha, se poderàn trapar es bilhetes tà votar tanben en aranés (occitan oficiauments). Aguesta ei era modificacion que s'a includit ena prepausa dera lei deth referendum qu'aguest deluns 31 de junhsèga enregistrèren es grops parlamentaris de Junts pel Si e era CUP. Iniciauments, era prepausa sonque establie era bilheta en catalan e castelhan, mès diuèrsi colectius occiatnistes demanèren era rectificacion de manèra urgenta. Atau, es bilhetes entà votar i seràn autant en catalan, castelhan coma aranés (occitan). Atau, era pregunta serie "Voletz que Catalonha vengue un estat indepenent en forma de Republica?" e era responsa binària "Òc/Non".

Eth Cercle d'Agermanament Occitano-Catalan (CAOC) auie enviat ua carta per corrèu electronic a toti es deputats independentistes deth Parlament entà que modifiquessen urgentaments era prepausa, en tot rebrembar qu'er occitan ei lengua oficiau en tota Catalonha. Eth membre de CAOC, Marçal Girbau, afirmaue coma ua "manca de sensibilitat non auer inclodit iniciauments er occitan enes bilhetes". Era deputada deth grop parlamentari dera CUP, Mireia Boya, j'auie manifestat eth sòn desacòrd pera manca der occitan, en tot qualificar-lo de "gran error". 

Per tant, i aurà un unic bilhet tà votar en Catalonha eth dia deth referendum, e ua auta milhorà serà qu'era Val d'Aran s'establirà coma ua naua demarcacion ara ora d'eméter eth vòt, amassa damb Lhèida, Barcelona, Girona e Tarragona. Era tramitacion amiarà ath plen deth Parlament de Catalonha a debàter, e possiblaments a aprovar, era lei ena session qu'aurà lòc pendent era prumèra setmana deth mes de seteme.