Damb era arribada deth nau an comence eth compde entà darrèr entara naua edicion dera Trail Vielha-Molières 3010, qu'aurà lòc eth 14 de junhsèga e qu'enguan se presente damb ua nauetat: era corsa Tuca Trail. 

A compdar d'aué, 10 de gèr, dejà son dubèrtes es inscripcions ena web dera corsa entà aguesta dusau edicion dera Trail Vielha-Molières, que compde damb un totau de 1.200 places repartides entre es tres carrères: era Maraton de Molières, era Montpius Skyrace e era naua Tuca Trail.

Es inscripcions demoraràn dubèrtes enquia aumplir totes es places enquiath 10 de junhsèga. Ath delà, enguan era organizacion a decidit premiar as 100 prumèrs/es s’inscriti/es damb  un 10% de descompde en quinsevolh des tres distàncies.

Es prètzi des inscripcions vàrien segontes era corsa: era Maraton Molières còste 46 euròs, mentre qu'era Montpius Skyrace 26 e era Tuca Trail 11 euròs.

Segontes afirme eth Baile de Vielha e Mijaran, Juan Antonio Serrano, "èm fòrça contenti d’organizar amassa damb eth Centre Trail Val d’Aran e damb Centre Excursionista d’Aran aguesta dusau edicion. Er Ajuntament de Vielha e Mijaran contunhe en tot apostar per aguesta carrèra e pròva d’açò son es recorsi que destinam entà que sigue tot un èxit, damb er objectiu de plaçar en Vielha e Mijaran e a tota era Val d’Aran coma er epicentre des espòrts de montanha e coma un lòc idonèu entara realizacion d’eveniments esportius”.

IMATGE: TRAIL VIELHA-MOLIÈRES