Eth maitin der 1 d’octubre a transcorrut en Vielha sense cap incidéncia important. Ath torn des 5 deth maitin s’an començat a agropar desenes de persones deuant der Institut d’Aran, que finauments a estat er unic collègi electorau dubèrt deth cap-lòc aranés.

Tàs 6 daurien es pòrtes e es defensors deth referendum entrauen en centre, avisats pes Mòssos d’Esquadra qu’estauen realizant ua accion illegau e qu’aurien d’abandonar er edifici.

Centenats de persones an passat pes urnes pendent es prumères ores deth referendum. Gent que venguie non sonque d’Aran, senon tanben d’autes parts deth territòri catalan. Toti amassa per ua madeisha causa, mès enlà des ideologies.

Pòc dempús d’auer començat era votacion, es Mòssos an acordonat era zòna, impedint eth pas as persones que volien entrar, mès qui volie votar a podut passar gràcies ara ajuda d’aqueri que non an abandonat er institut.